انا اتجوزت من 3 شهور يا موزز وهظبطكوا احلى تظبيطه من احلى عروسه

ازيكوا يا احلى فتوكات انا النهارده عملالكوا موضوع هيلم كل حاجه ممكن تحتاجيها او تسألى نفسك عنها فى جهازك وجوازك
عشان مااطولش عليكوا هنبدأ بسم الله

اولا القسم اللى بيشغل كل البنات فى الجهاز وبياخد اغلب وقتهم وهو المطبخ وده غلط وهرجع اقولكوا ليه بعد شويه
1ـ المطبخ
بصوا يا بنات اطقم الحلل انا جبت تيفال زهران وصاج تركى اللى هو مطلى تيفال واستيل تركى والمونيا الدهان

عايزه اقولكوا مااستخدمتش غير التيفال بس مش هقولك ماتجيبيش غير واحد لا هاتى اتنين او تلاته بالكتير وتنوعى فيهم ماين التيفال والسيراميك والاستيل واياكى والالمونيا مهما كانت قيمتها ملهاش لازمه برضو
انا جايبه طاستين مع التيفال واحده زهران وواحده نوفال عايزه اقولك مفيش اى فرق بينهم عشان كده لو عايزه تجيبى الطاسات نوفال بدل التيفال بحيث التكلفه تقل يبقى احسن لان بجد مفيش اى فرق طالما بتحافظى عليهم
وهاتيهم 3 مقاسات متفاوته ومتنسيش تجيبى واحده ستيل او المونيا للسمك والجو ده عشان ماتبوظيش التيفال
والاطباق برضو هاتى 3 وكلهم يكونوا شيك وبلاش الملامين والاركوبيركس
اطقم المعالق بجد اللى تجيب الشنطه تستاهل تييييييت
والله ولا ليها اى لازمه هاتى طقم معالق شيك زى ده

وده بتاعى على فكره وبالمناسبه ولا بيتخلع ولا بيتكسر ولا جو الافلام ده لان ده استانلس والبلاستيك عليه من الناحيتين مش راكب فيه اللى راكب فيه اوعى تجيبيه بيتخلع وهاتى معاه واحد اتنشرات يكون شكله حلو ومش هتحتاجى حاجه تانى ابدا وممكن تكبرى دماغك وتجيبى اتنين من اللى هو زى الاحمر ده وهيبقى 12 وقام بالواجب وزياده
الكاسات والله 4 حلوين اوى او 5 بالكتير اوى عشان هتحتاجى تغيرى بعد كده وهتتخنقى منهم ده غير الدربكه لما الحاجه بتطلع اكبر من احتياجاتك ومن المكان اللى هتحطى فيه
والاطقمه اللى زى المجات والخشاف والحاجات دى
كفايه 1وانا ماجبتش ولا شربات ولا كاكاو ولا الجو بتاع ستى ده والله كله مصاريف ودربكه على الفاضى والنيش بتاعى حاطه فيه الصينى والاركوبال و3 اطقم كاسات و2 كوبيات بس شيك اوى وطقم القهوه وجايلى هديه لو ماكنش جه ماكنتش جبته وطقم الخشاف ورصاه بطريقه شيك وبسيطه حاولت انزلهولكوا بس مش لاقيه الريدر حاولى تبقى رقيقه وبسيطه ومالكيش دعوه برأى حد انا ولا سمعت لكلام حد وفى الاخر فرحت اوى انى عملت اللى انا عيزاه وبس لانى طلعت صح ومعملتش افكار حجريه من ايام ستى ماما كانت تقولى يافضحتى ولا طقم شربات ولا طقم شاى ولا مفرش صيفى وهى دى المفاجأه انى ماجبتوش والله حاجات كلها قلق على الفاضى

2 ـ الاجهزه
بقى غساله وتلاجه ال جى وكويسين معايا الحمدلله
البوتجاز اى كوك وماانصحش حد بيه بعد شهرين الشوايه اللى بتشوى فرختين شوت قلبى وباظت والمروحه اللى بتوزع الحراره اعادت توزيع ضغط الدم فى جسمى وباظت هى كمان والعيون النار مابقتش متساويه كأن البوتجاز بقاله 7 ولا 8 سنين ومتصلح 15 مره فبجد بلاش منه
والميكرويف ده طبعا اختراع التسخين بس لسه مش جربت اسوى فيه حاجه ومش عايزه جدال عليه اللى مش عاجبه بلاش يجيبه انا اتكلمت فى الموضوع ده كتير اوى وزهقت منه
والقنبله يا بنات بلااااااااااش الكيتشن الكبيره والله ولا ليها اى لازمه انا كنت متمسكه بيها اوووووووووى واللى متابعنى فى المنتدى ممكن يفتكر اد ايه كنت بدافع عنها وحصلت ظروف فى الوقت قبل فرحى واضطريت اجيب المجموعه بتاعة الخلاط والكبه والمطحنه وجبت المضرب والعصاره لوحدهم وبقيت مقريفه وحاسه انى ناقصنى حاجه وبعد الجواز حمدت ربنا مليون مره بجد مش هتستخدمى غير الخلاط والكبه وكنت فاكره نفسى الشيفه اسماء وكل يوم هستخدم العجان طب والله ماعملت كيكه حتى لحد دلوقتى
فانتى خليكى عمليه وهاتى اللى ينفعك ومايكركبكيش ويغرمك اللى ملوش لازمه وفرى فلوسه فى حاجات اهم
هاتى طقم يكون ساده فى الاستعمال عشان يدخل الميكرويف بسهوله ومايقرفكيش زى كده مثلا
وطقم التوابل ده تحفه
ولو تقدرى تجيبى الدورين منه يبقى احسن عشان يشيل كل التوابل وكان فيه فتي انه صغير وهيقرفك ابدا والله هو بس الملح والافضل تحطيه لوحده فى علبه كبيره وخلصنا على كده وبعدين فيه فتحتين واحده بترشرش والتانيه بتدلق كأنها المعلقه يعنى وعملى جدا بجد ماشاء الله عليه
كنت جيباه من المعرض الدولى ب130
وطبعا متنسيش اطقمه التوزيع السيلكون والخشب وماتجيبيش الاستيل والتيفال لان الاول مالوش استخدام والتانى مش صحى اوى السيلكون افضل منه

الاماكن بقى عليكى وعلى حمام التلات بس تكونى ناصحه وتفاصلى جامد عشان دول حراميه وتفاصلى عند كزا حد مش اول واحد تاخدى من عنده وتمشى واوعى تشترى من هناك كزا حاجه من عند محل واحد لانه هيقرطسك جامد ولولا وقتكم كنت قولتلكوا حصلكوا ايه مع صاحبتى اضحك عليها فى كل طقم ييجى 100 جنيه بسبب انها اشترت حاجات كتير من محل واحد وهو هيقعد يقولك طب مش عايزه كزا طب طزا قوليله لا جبت لانه بيحاول يعود انه اداكى حاجه بسعرها ويسرقك فى اللى بعدها ولو عنيكى حتى هتطلع على حاجه عنده هتلاقيها فى مليون محل غيره
ولفى واعرفى الاسعار وخليكى شاطره
وتانى مكان معرض القاهره واهو قرب هو اسعاره مش ارخص من بره كتير بس بجد فيه كلللللل حاجه وفيه حاجات شيك اوى

3 ـ الهدوم
الملابس الداخليه
الاندرات هاتى كتير ان شالله 100 والله هاتى كتير بينفعوا اوى
والبراهات هاتى من 6 ل 8 حلو اوى ووفقيهم على الوان القمصان القطن(الكاشات) اللى عندك لانك بتلبسى تحتها براهات طبعا انا عملت كده كل قميص ليه برا لونه بجد شكلهم بيبقى تحفه حتى البانتى بيبقى نفس اللون وبالمناسبه جوزى خد باله وعلق جامد على الموضوع ده
اللانجيرى 10 والله كفايه اوى لانك طول النهار بترتاحى فى الاقطان والبيجامات الهوت شورت والعاديه اكتر بكتير من اللانجيرى اللى بيتلبس بالليل 10 دقايق والله جوزى من قلة مابيلحق يشوفهم بينسى شكلم عايزه تغرقى نفسك 15 حلو اوى اما بقى الكاشات اللى هى الاقطان كترى انا جايبه 6 وقولت يارتنى جبت تانى لانهم مريحين اوى وشيك فى نفس الوقت هاتيهم اشكالهم بناتى وشيك كده واللى كت واللى شولدر واللى كب واللى حماله يعنى نوعى فيهم وبلاش تكررى الالوان نصيحه ابديه بجد
والبيجامات ممكن تجيبى تلاتات بانواعهم هيبقى مناسب اوى وماتنسيش الروب الستان هاتى 1 او 2
وبلاش الداهيه اللى اسمها قميص بروب ملهاش تلاتين لازمه الروب الستان فوق القميص بيغنى
اماكن الشرا
الموسكى فيه محلات بتبيع الماركات الغاليه بسعر الجمله انا جايبه قميص مكتوب على علبته 120 خدته ب90 لانى باخد بسعر الجمله وطبعا فى محل اللانجيرى هتقولك ده سعر الشركه وجاى اهو على العلبه وجبت كام واحد من ماركه اسمها RED NIGHT الماركه دى بتقلد موديلات جويا وبجد خامتها روعه دى جايبه القميص ابو 90 اللى هو فى المحلات ب120 صوره طبق الاصل من اللى عجبنى عند جويا وكان ب 180 اتحداكى تفرقى مابينهم لو حطتيهمم جنب بعض

هكمل المشاركه الجايه ياقمراتى

جزاك الله الف خير محمد

ويسلموو علي الموضوع الجميل

سلمت يداك

شاكره لك علي الطرح المميز